Төтеншеліктер биыл көктемде Солтүстік Қазақстан облысында су тасқыны 2016 жылғыдан да қатты болады деп болжап отыр.
Бұл туралы ҚазАқпарат хабарлады.
Биыл жауған қардың қалыңдығы мен көлемі орташа жылдық көрсеткішпен салыстырғанда нормадан екі есеге асып кеткен. Қызылжар ауданында ылғал деңгейі нормадан 412 пайызға, Мағжан Жұмабаев ауданында – 359 пайызға, Тайыншыда – 295 пайызға асты. Былтыр көктемде қатқан мұз қалың болып, елді-мекендердің су басуына әкеп соқтырған болатын. Биыл да жердің қатуы былтырғы көрсеткіштен 15-55 см-ге асып түседі.
Синоптиктердің болжамынша, Солтүстік Қазақстан облысында қаңтар айында сібірден келген антициклонның әсерінен ауа-райы 38 градусқа дейін суытады. Ол кезде жердің қабаты одан бетер қатая түседі. Наурыздың үшінші жартысында күн күрт жылып, 8 градусқа дейін ысиды. Төтеншеліктердің айтуынша, ондайда қар тез еріп, тасқын судың пайда болуына әсер етеді. Облыстағы барлық акватория толып тұр және 20-дан астам елді-мекенді, теміржол мен тас жолдарды шайып кету қаупін тудырып отыр.
Нәтижесінде облыстағы 95 елді-мекенді топан су басуы ықтимал деген болжам жасалды. Онда 1,5 мыңнан астам үй мен 4,7 мың халық тұрып жатыр. Сонымен қатар жалпы ұзындығы 50 шақырым болатын 153 автомобиль және теміржол учаскесі қауіп үстінде. Сондай-ақ Петропавлдың шетіндегі бірқатар аудандарды су басуы мүмкін.
«Қазіргі уақытта облыстағы су тасқындарын алдын алуға бағытталған шұғыл шараларға арналған қаражат көлемі 226 млн теңгені құрайды», – дейді Асхат Бәкішев.
Өңірде 70 елді-мекенді қорғау бойынша инженерлік шаралар аяқталды, жол-көлік инфрақұрылымдары мен гидротехникалық құрылғылар салынды. Бекітілген жоспар бойынша, су тасқынынан зардап шегуі ықтимал елді-мекен тұрғындарын эвакуациялау көзделген.
Айта кетейік, былтыр 30 жылда ең ірі су тасқыны орын алған болатын. Облыста 400-ден астам үй мен 35 елді-мекен судың астында қалды. Тасқын судың зардаптарын жою үшін ҚР Үкіметінің қорынан 1,3 млрд теңге бөлінген.