«Қазақстан Аруы-2016» байқауының жеңімпазы Гүлбану Әзімханова, жеңісіне берілген ақшалай сыйлықтың жартысын қайырымдылыққа жұмсамақшы деп, хабарлайды Today.kz тілшісі.
Оның айтуынша, ол 2,5 миллион теңгені балалар үйіне жібереді.
«Жеңіске жетемін деп үміттендім. Мен сіздердің үміттеріңізді ақтаймын деп ойлаймын. Жүлдемнің ақшасын қалай жұмсаймын? Жартысын балалар үйіне беретін шығармын, ал қалған бөлігін ата-анама беремін»,- деді Гүлбану Әзімханова.
Естеріңізге сала кететін болсақ, Гүлбану Әзімханова «Қазақстан Аруы-2016» байқауының жеңімпазы атанды. Ол Қазақстан елін “Әлем Аруы 2017” халықаралық байқауында танытады.
Бірінші вице-мисс атағына Астана қаласынан Елназ Нұрсейітова ие болса, екінші вице-мисс болып, Көкшетаулық Жанар Найманбаева танылды. Ал үшінші вице-мисс атығына Өскеменнен Анастасия Усольцева ие болды.
Ұйымдастырушылардың айтуынша, байқау финалының билетінен түскен қаржы Астанадағы жағдайы төмен отбасыларға көмек ретінде беріледі.
Байқау барысында күтпеген жағдайлар да болды. Екі қатысушы бойжеткенге тұрмысқа шығу ұсынысы жасалды.
Естеріңізге сала кететін болсақ, 2015 жылғы еліміздің дарынды және ең таңдаулы сұлу атағына ақтаулық Әлия Мергенбаева ие болған еді. Ол жеңісіне алған қаржысының бестен бір бөлігін қайырымдылыққа жұмсайтынын айтып, ағынан жарылған болатын. Жүлде қорының бір миллион теңгесі Астана, Алматы, Ақтау қалаларындағы балалар үйіне жөнелтіледі.