Даулы Ninety One тобы өзіне наразыларға “Жыл таңдауы” концертінде жауап берді.
Мұны Youtube желісінде пайда болған видеодан тамашалауға болады.
Видеода топ мүшелері сахнаға шығып, “Қалай қарайсың” хитін орындайды. Бірақ олар әдеттегі әлем-жәлем, түрлі-түсті киімнен, сырғадан, бояудан бас тартқан. Қара киім киіп келіп, би билемей, қаққан қазықтай бір орындарында тұрып ән салды. Ал олардың артынан шыққан ақ жейделі бишілер де бисіз, қозғалмай тұрды.
Топ мүшелерінің бұл қылығы әлеуметтік желіде қазір қызу талқыланып жатыр.
Ал топтың продюсері Ерболат Беделханның жұбайы бұған қатысты Instagram желісінде былай деп жазды:
“Үнсіздікті елемеу деп, салқынқандылықты әрекетсіздік деп, жақсылықты әлсіздік деп ойламау керек. Қымбатты EagleZ, хореография сіздерге ұнады ма? Жігіттерге бір орында тұру өте қиын болды”, – деп жазды Асыл Беделхан.