Шымкентте иесі табылмаған 111 мың долларды мемлекет алатын болды
Шымкенттегі Абай аудандық сотының шешімінен кейін мемлекеттік бюджет 111 мың долларға байыды.
Бұл туралы Sputniknews.kz хабарлады.
Жеті жыл бұрын шекарашылар ұшақтан тапқан соманың иесі анықталмауына байланысты қаржы мемлекетке өткізілген.
Көлемді қаражатты қазақстандық шекарашылар Стамбул – Шымкент ұшағын тексеру кезінде тауыпты. Алайда ақша жолаушылардың ешқайсысына тиесілі болмай шықты.
Ұшақтан 111 мың доллар табылғалы бері жеті жыл өтсе де, иесі анықталмады. Осы уақыт аралығында ақша айғақ ретінде тергеуде сақталған. Заңның механизмдері мен баптары ірі сомаға құқықтық мәртебе беруге кедергі жасап, тек биыл ғана заңдағы өзгерістерге байланысты контрабандалық қаражат заңдастырылып, мемлекет бюджетіне аударылды.
“Биыл қылмыстық жауапкершілікке тартылу үшін контрабандалық ақша көлемінің шектік мәні артуына байланысты заңға өзгертулер енгізілгеннен кейін қылмыстық іс тоқтатылды”, — деп мәлімет берді Шымкенттің көліктегі прокуратура баспасөз қызметі.
19 қыркүйекте Шымкенттің Абай аудандық соты қаражатты “иесіз” деп танып, мемлекеттік бюджетке аударуға шешім қабылдады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе