Халықаралық олимпиада комитеті Ресейді Рио Олимпиадасына қатыстыру туралы дұрыс шешім шығарды, деп есептейді ҚР Парламенті Сенатының төрағасы Қасым-Жомарт Тоқаев.
Бұл туралы сенатор Twitter-дегі жеке парақшасында жазды.
«Халықаралық олимпиада комитеті Ресейді Рио Олимпиадасына қатыстыру туралы дұрыс шешім шығарды. «Таза» спортшылар басшылардың былығы үшін жауапкершілік алмауы керек», – деп жазды Қасым-Жомарт Тоқаев.
Отырыс шешімі бойынша Халықаралық олимпиада комитеті Ресей Федерациясы атлеттерінің 2016 жылғы Олимпиадаға қатысуы туралы шешімді спорт түрлері бойынша халықаралық федерация қабылдайтынын айтты.
Айта кетейік, бүгін британиялық танымал Daily Mail басылымы Халықаралық олимпиада комитеті (ХОК) бүкіл РФ құрамасын «мемлекеттік допингтік бағдарламасы» үшін жазалап отырғанын, ал ХОК-тың ұстанымы «допинг – спорт атаулыға жасалған шабуыл» екенін алға тарта отырып, ресейлік спортшыларды Олимпиада ойындарынан шеттететіні туралы жазады.
Сондай-ақ, кейбір дереккөздер келтірген дәйектерге сүйенсек, Ресей спортшыларын тек Риодан ғана емес, 2018 жылы Оңтүстік Кореяда өтетін қысқы олимпиада ойындарынан да шеттету мәселесі қарастырылып жатқаны айтылған.