Гүлзира Атабаева: Білім берудің зайырлы сипатын бекіту Қазақстан жастары үшін ерекше маңызға ие

«Жастар үшін бұл абстрактілі емес, практикалық мәселе. Мектеп – бұл тең мүмкіндіктер мен дәстүрлерді құрметтеу кеңістігі. Конституциядағы тікелей норма тәрбие мен білім беру жүйесі үшін айқын бағдар болады», – деді Гүлзира Атабаева.

Оның пікірінше, дінді мемлекеттен бөлу қағидатын тікелей бекіту туралы ұсыныс та маңызды.

«Бұл жастар үшін түрлі көзқарас пен наным-сенімге қарамастан, мемлекеттің бәріне бейтарап және тең болып қалуының кепілі. Осындай сезімтал саладағы конституциялық норманың айқындылығы қоғамдық келісім мен билік институттарына деген сенімді нығайтады», – деп атап өтті Гүлзира Атабаева.

Ол «Келешек» жастар кеңесі шығармашылық еркіндіктің, сөз бостандығының және зияткерлік меншікті қорғаудың кепілдіктерін күшейту жөніндегі бастаманы толық мақұлдайтынын айтты.

«Қазіргі жастар идеялар, контент және инновациялар ортасында өмір сүреді. Зияткерлік еңбекті нақты қорғаусыз ғылымды, мәдениетті және шығармашылық экономиканы дамыту мүмкін емес. Бұл қағидаттарды конституциялық бекіту – елдің зияткерлік әлеуетіне инвестиция», – деп атап өтті спикер.

Қорытындылай келе, ол Конституцияға заманауи ұғымдарды енгізу цифрландыру мен жасанды интеллектінің қарқынды дәуірінде қазақстандық қоғамның табысты дамуына ықпал ететінін айтты.

Бұдан басқа, ұсынылып отырған өзгерістер қазақстандық қоғамның айқын ережелерге, болашаққа бағдарланған күшті және әділ мемлекетке деген сұранысын толық көрсетеді.