Ғасыр жасаған майдангер. Белгород, Харьков, Полтава, Кременчуг жерлерін азат етуге қатысқан ардагер 100 жасқа толды
Қостанай облысы Денисов ауданы Қарпық ауылында дүниеге келген Шәңгерей Жәнібеков 100 жасқа толды. Ата-анасынан ерте айырылған ол туыстарының тәрбиесінде болған. 1942 жылдың қыркүйегінде Қостанай медициналық училищесін бітіргеннен кейін Шәңгерей Жәнібеков Кеңес Армиясының қатарына әскери фельдшер ретінде шақырылды.
Ол соғыста Брянск, Степной және Екінші Украин майдандарында жаралыларға көмек көрсетті. Белгород, Харьков, Полтава, Кременчуг, Кировоградты азат етуге, Корсун-Шевченков және Ясско-Кишинев операцияларына, сондай-ақ Румыния, Венгрия, Чехословакия және Австрия аумақтарындағы неміс-фашист әскерлеріне қарсы шайқастарға қатысты.
Запасқа шығарылғаннан кейін Шәңгерей Жәнібеков еңбек жолын жалғастырды. Қостанай қалалық комитетінің бірінші хатшысы және Қостанай облыстық партия комитетінің екінші хатшысы болды. 1976 жылы Қазақ КСР Министрлер Кеңесі төрағасының орынбасары болып тағайындалды.
Зейнеткер ретінде Шәңгерей Жәнібеков шетелдегі қазақтармен мәдени байланыстар жөніндегі республикалық қоғамды басқарды. Қазақ Республикалық соғыс және еңбек ардагерлері кеңесінің төрағасы, кейін осы Кеңес Төралқасының мүшесі болды. Шәңгерей Жәнібекұлының өмір жолы батылдықтың, жанқиярлықтың және Отанға адалдықтың жарқын үлгісі.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе