Димаш Құдайберген қатысып жатқан Singer-2017 телебайқауында VI турында Лара Фабианның атақты Adagio әнін итальянша орындап, І-орын алғаны белгілі.
Әлеуметтік желіде Димаштың осы өлеңді орындауына қатысты шетелдік блогердің баға беру видеосы пайда болды. Бұл өлеңді орындау екінің бірінің қолынан келмейтінін айтқан Наташа Ламберд Димаш сахнаға шығып, төмен нотадан бастағанда-ақ: „Бұл оның қолынан келеді екен„ деп қолын шапалақтап, таң қалысын жасыра алмады.
„… Міне, қазір академиялық дауысқа көшті… Міне, өнер, міне талант! Мұны орындау өте қиын, өте ауыр… Оның дауыс аппараты қалай орналасқан, оған менің миым жетпейді, бірақ бұл ешкімнің қолынан келмейтін нәрсе. Ол бұрыннан қайда жүрген, неге көрмегенбіз? Денем түршігіп, көзіме жас тығылды.
Құдай-ау, оны тезірек Евровидениеге жіберейікші! Мынандай әсем дауысты көрсін барша әлем! Адажионы бұлай ешкім орындаған емес.
Мен Квинов туралы айтқанмын алдында. Бірақ Димаш Квиновтан да асып түсті. Ішімдегінің барлығын астан-кестенін шығарды. Бұлайша ән салу үшін оның ішкі дүниесі қандай күй кешті, оны елестетудің өзі қиын. Ол жан-тәнімен беріліп орындағанын бір қарағаннан-ақ түсінуге болады. Тамаша! Сөзім жоқ„, – дейді шетелдік блогер Наташа Ламберд.
Айта кетелік, еліміздің құзырлы өкілдері Димаш Құдайбергеннің Евровидениеге қонақ ретінде баруы туралы келіссөз жүргізіп жатқаны туралы бір ақпараттар болды. Ал Евровидение халықаралық байқауына Қазақстан қатыса алмайды екен.