ҚР Энергетика министрі жанар-жағармайдың қымбаттауына байланысты мәлімдеме жасады.
Министр Қанат Бозымбаевтың мәлімдеуінше, бұл уақытша құбылыс. Павлодар мұнай өңдеуші зауытында құрал-жабдық аяқ-астынан сынып қалған деп хабарлады Tengrinews.kz.
– Нарықта Қазақстандағы 3 мұнай өңдеуші зауыттың өнімдері және Ресейдікі де бар. Бізбен салыстырғанда, Ресейдің көтерме бағасы қымбат. Шымкент зауыты жоспарлы күрделі жөндеуден өтіп жатыр. Онда технологиялық прогресті қажет ететін құрал-жабдықтар модернизацияланып жатыр. Ол 12-сі күні жұмыс істей бастауы мүмкін.
Сол секілді, 20 күн бұрын Павлодардағы мұнай өңдейтін зауыттың құрал-жабдығы аяқ астынан істен шықты. Салдарынан, нарыққа жеткізілетін өнім көлемі 4-5 пайызға азайды, яғни қазақстандық арзан бензин азайды. Есесіне, Ресейдің бензині көптеп келіп жатыр. Бірақ ол қымбат.
Кез келген трейдер екеуін араластырып, орташа бағаны шығаратыны белгілі, – деді министр.
Қанат Бозымбаевтың айтуынша, АИ-92 жанар-жағармайының қымбаттауына қатысты мәселе 7-10 күнде шешіліп қалады.
– Біз баға өзгереді деп үміттенеміз. Егер өткен жылғы есепке сүйенсек, менің әріптесім де қазан айында осындай мәселеге қатысты жауап берген. Ол кезде бензин құны 127 теңге еді, ал ақпан айында ол 123 теңгеге түсті. Біз осы жолы да солай болады деп болжаймыз.
Еске сала кетелік, өткен демалыс күндері қазақстанның жанар-жағармай құю стансаларында 1 литр жанар-жағармай 125-тен 128 теңгеге өскен болатын.