Елбасы Қаржы министріне жекешелендірудің ІІ-кезеңіне кірісуді тапсырды
Мемлекет басшысы Нұрсұлтан Назарбаев Қаржы министрі Бақыт Сұлтановпен кездесті.
Бұл туралы Ақорданың баспасөз қызметі хабарлады.
Кездесу барысында Бақыт Сұлтанов Елбасыға Қаржы министрлігінің биылғы 9 айда атқарған жұмысының қорытындысы, республикалық және жергілікті бюджеттің атқарылуы, сондай-ақ Мемлекет басшысының төрағалығымен 2016 жылғы 9 қыркүйекте өткен Үкіметтің кеңейтілген отырысының қорытындысы бойынша берілген тапсырмалардың іске асырылуы туралы баяндады.
Сондай-ақ, Қазақстан Президенті жекешелендірудің екінші кезеңін іске асыру жөніндегі шараларды жүзеге асыру қажеттігіне айрықша тоқталды.
– Мемлекеттік нысандарды отандық және шетелдік инвесторлардың меншігіне беру ісінің мейлінше жариялылығы мен тиімділігін қамтамасыз ету қажет, – деді Нұрсұлтан Назарбаев.
Бұдан бөлек, Мемлекет басшысы мүлікті заңдастыру жөніндегі науқанның соңғы кезеңіне қатысты міндеттер қойды. Мәселен, Қазақстан Президенті бұл науқанды жүргізу барысында қалыптастырылған жариялылық жағдайын атап өтіп, оның ел экономикасы үшін нәтижелілігін айтты.
– Мүлікті заңдастыру салық есебінен бюджетті толықтырып, одан әрі экономикаға пайдасын тигізетін активтерді анықтауға мүмкіндік беретін болады. Бұл – салық жүйесінің басты міндеттерінің бірі, – деді Елбасы.
Қаржы министрі тиімді экономикалық саясат пен «Нұрлы жол» мемлекеттік бағдарламасын іске асыру барысында заңнамаларға өзгерістер енгізу, салық пен кедендік басқаруды жетілдіру есебінен бюджет кірісінің тұрақтануы және биыл оның 7,4 пайызға өсуі байқалып отырғанын мәлімдеді.
Кездесу қорытындысы бойынша Елбасы бірқатар нақты тапсырма берді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе