Елбасыға Ираннан санкцияның алынуына қосқан үлесі үшін алғыс білдірілді
Иран президенті Қазақстанға кеше кешкісін келген болатын.
Иран Ислам республикасының президенті Хасан Роухани Қазақстан президенті Нұрсұлтан Назарбаевтың Иранның бейбіт ядролық бағдарламасы бойынша келіссөздері мен халықаралық санкцияның алынуына қосқан үлесін атап өтті.
“Иран мен алтылықтың арасында келісім орнатудағы ерекше рөліңіз бен ортақ іс-әрекеттерді жүзеге асыру жоспарындағы айрықша орныңызды атап өткім келеді. Және де бейбіт атом саласында Иран мен Қазақстанның ізгілікті ынтымақтастығы үшін алғысымды білдіремін”, — деді Роухани бейсенбі күні Назарбаевпен өткізген келіссөздер барысында.
“Менің пікірімше, сіздің бүгінгі іссапарыңыз – биыл сәуір айында Тегеранда өткен келіссөздердің жалғасы. Бұл кездесу де оң нәтижелер береді деп санаймын: менің іссапарым аясында жалпы сомасы 1 миллиард долларға коммерциялық келісімдер жасалған болатын, бұл жұмыстар әрі қарай жалғасын тауып жатыр. Көпшілігі жүзеге асырылуда, алдағы істер үшін де күш біріктіріп, жұмыла кірісуіміз керек”, — деді Назарбаев.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе