ЭКСПО кезінде астаналық студенттер жатақханадан қуылуы мүмкін

«Маған әкімненмін деп бір адам келді, “Астана ЭКСПО-2017” ұлттық компаниясының өкілі екен. Ол келер жылы мамыр айынан бастап Астанаға 5 миллион адамның келетінін айтты. Бізге – ректорларға шетелдік қонақтарды жатар орынмен қамтамасыз ету тапсырылған. Бір күнде мыңдаған қонақ келеді деп күтілуде. Олардың бәрі бір жерге тоқтауы керек қой, ал, бізде қонақ үйлер жетіспейді. Сондықтан, жатақханаларды дайындауға тура келеді», – деді Қазақ ұлттық өнер университетінің ректоры Айман Мұсаходжаева Қоғамдық кеңестің отырысында.

Алайда, жатақханалардың өзі қонақтарды күтіп алу мәселесін толықтай шеше алмайтын секілді. Өйткені, олардың бәрінде небәрі 5 мың ғана орын бар екен. Ректордың айтуынша, Астанада әу баста студенттік қалашық салынуы тиіс болған. Алайда, ол жобаға сол күйі қаржы аударылмапты.

«Енді олар (әкімдік өкілдері – авт.) бізге келіп жатақханаларды жөндеуден өткізіп, қонақ үй ретінде беруімізді сұрап отыр. Олай болатын болса біз студенттерді бөлмелерінен қуып шығуымыз керек. Бірақ, 5 миллион адамның мәселесін 5 мың орындық жатақханалармен шешуге болмайды ғой?!», – дейді А.Мұсаходжаева.

Астана әкімінің орынбасары Ермек Аманшаев та мұндай проблеманың бар екенін жасырмайды. Оның айтуынша, жергілікті билік қазір тығырықтан шығудың түрлі жолдарын қарастырып жатқан көрінеді.

«Иә, бұл проблема қазір өзекті болып тұр. Бір күнде 65 мың адамға дейін келеді деп күтілуде. Сондықтан қазір проблеманың шешімін жан-жақты талқылап жатырмыз», – дейді әкімнің орынбасары.