Денсаулық сақтау министрлігі коронавирус жұқтырған адамдармен байланыста болғандарды іздестіруде

13 наурыз 2020, 16:55

144

“Қазіргі міндетіміз – ауру жұқтырған адамдармен бірге бір бортта ұшқан, олармен соңғы уақытта араласқандарды тауып, оқшаулау және бақылау. Бұндай іс-шаралар басталып кетті”, – деп мәлімдеді Денсаулық сақтау министрі Нұр-Сұлтан қаласында өткен брифингте.

“Байланысқа түскендерді анықтап, олардың денсаулығының жағдайы туралы ақпара жинағаннан кейін, қажет болса тексеру жүргіземіз”, – дейді министр.

“Біз олармен бірге ұшқан жолаушыларды анықтадық. Осы бортта кімнің ұшқанын білеміз, оларды оқшаулап, жағдайын анықтаймыз. Сондай-ақ олардың да кіммен байланысқа түскенін анықтаймыз, санитарлық қызмет мамандары осындай тізбек алгоритмі бойынша жұмыс істейді”, -деп толықтырды Біртанов.

Қазақстанның екі азаматында коронавирус анықталды

Бұған дейін Біртанов Қазақстандағы коронавирус жұқтырған екі азамат (1974 жылғы ер адам мен 1984 жылғы әйел адам) туралы хабарлаған болатын. Науқастардың екеуі де Алматыда, олардың жақында Германиядан келгені анықталды.