Оралда жат ағымды ұстанған 17 жігіт ұсталды
Батыс Қазақстан облысында исламның жат пиғылды ағымын қолдаушылар іске асырмақшы болған бейберекетсіздіктің алды алынды. Бұл туралы ҚР терроризммен күрес жөніндегі облыстық штаб өкілдері мәлім етті.
ҚР терроризммен күрес орталығы таратқан хабарламаға сәйкес, Батыс Қазақстан облысы бойынша Ұлттық қауіпсіздік комитетінің департаменті Батыс Қазақстан облысы ішкі істер департаментімен бірлесе отырып, исламның бөтен ағымдарының бірін жақтарушыларға қатысты жедел келіп түскен мәліметті тексерді. Бірнеше адам Атырау облысының 1994 жылы туған өз ағымындағы жігітке белгісіз біреулер тартып алған көлігін қайтарып беруге қолдау көрсетпекші болыпты.
«Ықтимал жағымсыз салдарды болдырмау мақсатында, 17 адам анықталып, ұсталды. Олар 10 маусым күні сағат 02:00-де жанжалдасушы тараппен кездесу үшін Асан кентіне аттанбақшы болып, «Бәйтерек» базары маңында топтасып тұрған жерінде құрықталды. Көліктерді тінту кезінде 5 сойыл және 1 арматура алынды», делінген терроризммен күрес жөніндегі штабтың хабарламасында.
Ұсталған адамдар Орал қаласы ішкі істер департаментіне жеткізіліп, бастапқы тергеу шаралары жүргізіліп жатыр. Тексерудің қорытындысы туралы штаб өкілдері қосымша мәлімдейтін болады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе