Қазақстанда адамның ағзасын сатуға да, сатып алуға да рұқсат жоқ. Алайда Алматы облысында тұратын Өзбекстан азаматшасы өз бүйрегімді 3 миллион теңгеге сатамын деп ағзасын ашықтан ашық саудаға қойды. Шарасыздықтан әрине. Келіншекті бүйрегін сатуға не мәжбүрледі?
Бұл туралы 31 арна хабарлайды.
Жұмыс істеп, ақша табуды көздеген Сайора Сатыбалдиева күйеуімен бірге Андижан облысынан 2014 жылы келген. Алайда, жас келіншек Қазақстанға келгелі екі құрсақ көтеріп, балалармен отырып қалады. Қазір ол отбасымен аядай ғана бөлмені паналап отыр. Отағасының ай сайын тапқан жалақысы кейде жалдамалы пәтер мен балалардың тамағына да жетпей қалады екен. Отбасы суға піскен картоп, қара нан мен қара шәйға қарап отыр. Екі жасар Сәбинаға айранның өзі айына бір-ақ рет алынады екен.
Жас келіншектің тұрақты мекен-жайы мен жұмысы болмаған соң құжаттары да заңдастырылмаған. Сондықтан ол кез-келген уақытта Өзбекстанға департациялап жіберсе, балаларымнан айырылып қалам ба деп қорқады. Тұңғышы Сәбинаны туғанда жолдасы әупірімдеп ақша тауып, перзентханадан туу туралы анықтаманы алған. Ал ұлын босанғанда туылғандығын растайтын бір-ақ жапырақ қағазға да зар болып қалған.
«Келісім-шарт бойына кассаға ақшасы төленбегендіктен өз еркімен құжаттарын тастап кеткен. Сол кезде жазып кеткен қолхат. Мен жақын кезде келіп, ақылы жатқан күндерімді төлеп, құжатымды, выпискамды аламын деп тастап кеткен. Одан кейін ол әйел бізге хабарласқан жоқ», – дейді Қарасай аудандық аурухана директорының орынбасары Гүлмира Чакчабаева.
«31 арна» тілшілері барған соң ғана дәрігерлер түсіністікпен қарап, әйелдің құжаты мен баланың Қаскелеңнің перзентханасында туылғандығын растайтын анықтаманы тегін берді. Алайда мәселе бұнымен шешілмейін деп тұр. Себебі сәбилердің туу туралы күәлігін жасату үшін өзбек әйел тұрақты тіркеуге тұруы керек. Ал бейтаныс адамды өзіне тіркеуге қоюға ешкімнің құлқы жоқ.
«Ана жаққа барсам, анда бар дейді, ары-бері жүргізіп жатыр. Бір айдан бері қиналып кеттім, документ жөндеймін деп. Ақшам жоқ менің, бүйрегімді сатудан басқа амалып қалған жоқ. Балаларым үшін бәріне дайынмын», – дейді қапаланған ана.
Сайораға балаларына туу туралы күәлікті жасату үшін талай мемлекеттік органдардың табалдырығын тоздыру керек. Алайда халыққа қызмет көрсету орталығы бұл біздің құзыретімізде емес деп камераға комментарий беруден бас тартып отыр.