ҚР білім және ғылым министрі Ерлан Сағадиев еліміздегі балабақшалардағы тәрбиешілердің жалақысы көтерілетінін мәлімдеді.
Ерлан Сағадиевтің сөзінше, мектепке дейінгі білімнің сапасын көтеру мақсатында жасалған жол картасында бірнеше ұсыныс жасалып отыр. Бүгінде аталған ұсыныстар талқыланып жатыр.
«Біріншіден – бірыңғай біліктілік, мұғалімдерге сияқты ұлттық тестілеуді енгізу. Биыл 60 мың мұғалім бізге келіп, ұлттық тестілеуден өтті. 36 мың мұғалім жоғары баға алып, жаңа біліктілікке ие болды. Сонымен айлықтары 30-50 пайызға дейін көтеріліп отыр. Енді соның бәрін тәрбиешілерге ұсынып отырмыз», -дейді министр.
Білім министрінің айтуынша, бірыңғай біліктілігін арттырған және ұлттық тестілеуден өткен тәрбиешілердің жалақысы 30-50%-ға көтеріледі.
«Екіншіден, министрлік барлық тәрбиешілерді В3 блоктан В2 блокқа көтеру ұсыныстарын және есебін дайындап отыр. Келесі жылы оны мемлекеттік бюджеттік комиссияға шығаратын боламыз. Үшіншіден, мектептердегі сияқты жаңартылған мазмұнмен жұмыс істейтін педагогтарға қосымша ақы төлеу қарастырылады», – дейді Сағадиев.