Ресей астанасында белгісіз біреу оппозициялық саясаткер Алексей Навальныйға жасыл дәрі шашып кетті. Оқиға Жемқорлықпен күрес қоры кеңсесінің алдында, саясаткер Global Event Forum жиынында баяндама жасауға шығып бара жатқанда болған.
Навальныйды ауруханаға жеткізуге тура келді – оның көзіне жасыл дәрі тиіп кеткен. Дәрігерлер саясаткердің “оң көзін химиялық күйік шалғанын” анықтады.
Биыл наурыз айында Барнауылда Навальныйға белгісіз біреулер жасыл дәрі шашып кеткен еді. Сол кезде саясаткер шабуылға қарамастан, жақтастары алдында сөз сөйлеген.
Алексей Навальный 2018 жылы президенттік сайлауға қатысуды көздейді. Оппозициялық саясаткерді шамамен 400 мың сайлаушы қолдап отыр. Қазіргі таңда саясаткердің 25 сайлау штабы жұмыс істеп жатыр.