Солтүстік қазақстандықтар тағы бір биік межені бағындырды.
Елбасы Мағжан еліне келген биылғы жұмыс сапарында «Солтүстік Қазақстан облысы әлеуметтік-экономикалық даму қарқыны жөнінен қазір еліміздің озық өңірлерінің қатарында. Жері құнарлы, бұл өңірде бидай ғана емес, майлы дақылдар да шығымды», деп ішкі әлеуетіне жоғары баға берген болатын деп жазады «Егемен Қазақстан» газетінің Солтүстік Қазақстан облысындағы тілшісі Өмір Есқали.
Сала ардагерлері, еңбек озаттары қатысқан алқалы жиында күзгі орақ жұмыстары қорытындыланып, гектар берекелілігі 18 центнерден айналғаны мәлім етілді. Бұл – Отан қамбасына 5,8 миллион тонна астық құйылды деген сөз. 1991 жылдары түсімділік 6,4 центнерді құрса, бүгінгі күні 2,5 есе өсіп отыр. Мемлекеттің зор қолдауы, агротехникалық шаралардың тиімді қолданылуы арқасында өңірде азық-түлік қауіпсіздігін қамтамасыз етудің шаралары жан-жақты қарастырылып келеді.
Бүгінде облыс аумағында 861 ауылшаруашылық кәсіпорны, 3653 серіктестік пен шаруа қожалығы, жалпы сыйымдылығы 6,6 миллион тоннаны қамтитын 52 астық қабылдау орны жұмыс істейді. Ауылшаруашылық өнімдерін қайта өңдеу бағытында да игі ізденістер, жемісті істер аз емес. Жыл басынан бері 1,1 миллиард теңгенің 11 жобасы пайдалануға беріліп, 131 жаңа жұмыс орындары ашылды. 1 миллион 46 мың тонна ауылшаруашылық өнімдері экспортталып, сыртқы нарық көкжиегі кеңейе түсті.
Күзгі орақ науқаны қырда егін өсірген диқан қауымының маңдай терінің, қажырлы еңбегінің жемісін ақтап, күш біріктірсе, алынбайтын асудың жоқтығын, ортақ мақсат жолында толымды табыстарға жетуге болатынын тағы бір мәрте дәлелдеп берді. Гектар берекелілігін 21,7 центнерден айналдырған Аққайың ауданы жеңімпаз ретінде танылып, 15 миллион теңгенің сертификатын иеленді. Мағжандықтарға 10 миллион теңгенің, жамбылдықтарға 5 миллион теңгенің сертификаты тарту етілді. Кең даланы еңбек дүбіріне бөлеп, агроөнеркәсіп саласының дамуына өз үлестерін қосқан бір топ механизатор, комбайншыға «Еңбек ардагері», «Ауыл шаруашылығының үздігі» медальдары мен төсбелгілері, құрмет грамоталары мен алғыс хаттар табысталды.
– Биыл Үкімет тарапынан 800 миллион теңге субсидия бөлінді. 877 миллион теңге инвестиция тартылды. «Астраханское» ЖШС өнімділікті 35 центнерден асырып, рекордтық өнім алды, – деді сөйлескенімізде Аққайың ауданы әкімінің орынбасары Еркін Жақыпов.
Қошеметке бөленгендердің бірі «Мәмбетов және К» командиттік серіктестігінің механизаторы Ардақ Сағитов ауыл шаруашылығы саласына 31 жыл ғұмырын арнап, маңдай терін төгіп келеді. Бұрындары «Нива», «Енисей» комбайндарын тізгіндесе, енді «Есіл-763» техникасын ұршықша үйіреді. Костанайда шығарылатын бұл комбайнның артықшылықтары көп. Ең бастысы, теріскейдің ауа райына лайықталып жасалған, дейді ол. Жамбыл ауданы «НТС-Агро» серіктестігінде бас агроном қызметін атқаратын Сәкен Қайыржанов жастар ауылға көптеп келсе, аға буынның ізін басып, жолын жалғастырса деген игі тілегін жеткізді.