Азаматтық қоғам қалыптастыруда волонтерлердің еңбегі зор

Бүгінгі күні волонтерлік бағыттары кеңіп, түрлі сала мамандарын біріктіретін бұл ұғым өмір сүру стиліне айналып үлгерді. Жас ұлан ұйымы өз бастауын алған кезден бастап, жастар мен жасөспірімдерге осы моральдік қағиданы ұстап, қоғам игілігіне қызмет көрсетуді дәріптеп келеді. Қызметтік жолында түрлі волонтерлік шаралар мен жобалар ұйымдастырып, тіпті мультфильм мен ертегі шығарып та үлгерді.

Биылғы жылы Жас ұлан ұйымы тағы да бір үлкен жобаны жүзеге асыруда. Ол ҚР Ақпарат және қоғамдық даму министрлігінің қолдауымен және «Азаматтық бастамаларды қолдау орталығы» КЕАҚ бірлескен «Birgemiz: Bilim» жалпыұлттық жобасы.

Жоба құндылығы еліміз бойынша білім саласының волонтерлеріне ортақ алаң құру, ортақ жұмыс ұйымдастыру, әр өңірге әсіресе ауылдық мекендерге волонтерлік көмек көрсету.

Жұмыла көтерген жүк жеңіл демекші, 2000 волонтерді арнайы оқытудан өткізіп, біліктіліктерін арттыру және осы біліктіліктерімен халықтың түрлі топтары үшін цифрлық, қаржылық, тілдік, компьютерлік сауаттылық саласында оқыту іс-шараларын, шеберлік сыныптарын, семинар-тренингтер өткізу.

Заман ағымына сәйкес бұл бағыттар үлкен сұранысқа ие және жіті меңгеруді талап етеді. Жоба аясында кемінде 5000 адамға волонтерлік көмек көрсету жоспарлануда. Волонтерлер үшін бұл өз біліктілігін арттырумен қатар, білім беру бағытындағы ойларын, жаңа бағыттарды талқылау мен жүзеге асыру бойынша үлкен платформа. Жоғарыда аталған бағыттар бойынша маман болсаңыз, сізді осы жоба алаңының мүшесі атануға шақырамыз.