Атырау облысының қылмыстық істер жөніндегі мамандандырылған ауданаралық соты қарақшылық шабуыл жасаған екі адамға қатысты үкім шығарды, деп хабарлайды Атырау облыстық сотының баспасөз қызметі.
Сотта анықталғандай, сотталушылар М. және С. «Оса» тапаншасымен қаруланып, беттеріне бет-перде киіп, жеке меншік үйге баса-көктеп кіріп келеді. Сөйтіп, үй ішіндегі 59 жастағы әйел адамның қол-аяғын байлап, тапаншамен қорқытып, үйдегі 23 030 965 теңге ақшаны және жалпы құны 870 000 теңгені құрайтын алтын бұйымдарды алып, оқиға болған жерден бой тасалайды.
– Жәбірленушінің көмек шақырған дауысын естіген көршісі қарақшылардың соңынан көлігімен қуады. Содан қолында тапаншасы бар сотталушы С.-ны ұстап алып, оны жақын маңда өтіп бара жатқан әскери бөлімнің қызметшілеріне тапсырады, – делінгін баспасөз қызметі таратқан ақпаратта.
Бірақ көп ұзамай, ол да полиция қызметкерлерінің құрығына ілінді.
Сот қаскүнемдерді Қазақстан Республикасының Кылмыстық кодексі 192-бабы 4-бөлігінің 2-тармағымен (аса ірі мөлшерде жасалған қарақшылық) кінәлі деп таныды. Үкім бойынша сотталушы С. 10 жылға, ал оның сыбайласы М.-ның әрекетінде қылмыстың қауіпті қайталануына байланысты 10 жыл 6 айға бас бостандықтарынан айырылды. Сондай-ақ, олардың дүние-мүлкі тәркіленіп, олардан жәбірленушіге келтірілген шығын өндірілді.
– Сонымен қатар, сот қарақшыларды құрықтау кезінде ерлік көрсетіп, батылдық танытқан жәбірленушінің көршісін марапатқа ұсыну туралы Атырау қалалық әкімі мен Атырау облыстық ІІД-не бастығының атына жекеше қаулы шығарды, – дейді баспасөз қызметіндегілер.
Сот үкімі заңды күшіне енген жоқ.