“Ата кәсібі ме еді?”
Күріш өсіріп, аты әлемге әйгілі болған Сыр өңірінде есірткі өсірумен айналысқан үш азамат құрықталды, деп хабарлайды Қызылорда облысы ішкі істер департаментінің баспасөз қызметі.
Республика аумағында жүргізіліп жатқан «Көкнар» жедел-профилактикалық шарасы барысында қызылордалық полицейлер Ұлттық Ұланның және Есірткі бизнесіне қарсы күрес департаментінің қызметкерлерімен бірлесіп, Кармақшы ауданы, Қуаңдария ауылдық округінен 8 км. қашықтықта есірткі өсіп тұрған алқапты анықтады.
– Ағымдағы жылғы 1-тамызда өсіруге заңмен тыйым салынған 2305 түп сора өсімдігін күтіп-баптап отырған жерінен 37 жастағы, 34 жастағы және 33 жастағы үш қала тұрғыны ұсталды. Тексеру барысында, аталған өсімдіктің жалпы салмағы 461 килограммды құрайтындығы белгілі болды.
Сонымен қатар, аталған аумақтан ыдыс-аяқтар, есірткі затын өсіруге және тұтынуға арналған құрал-саймандар мен өзіне тән иісі бар жасыл түсті зат салынған 2 қап тәркіленді. Қаптардың ішіндегі шөптектес затқа сараптама тағайындалып, нәтижесінде, оның жалпы салмағы 3 килограмм 939 граммды құрайтын «кептірілген марихуана» есірткі заты екендігі анықталды, – делінген департаменттің баспасөз қызметі таратқан ақпаратта.
Қазіргі таңда, аталған үш азаматтың үстінен Қазақстан Республикасы Қылмыстық кодексі 300-бабының 2-бөлігі және 296-бабының 4-бөлігі бойынша қылмыстық іс қозғалып, сотқа дейінгі тергеп-тексеру амалдары жүргізілуде. Құрықталған үш азамат Қармақшы аудандық ішкі істер бөлімінің Уақытша ұстау абақтысына қамауға алынды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе