6-маусымнан бастап жол полициясы біржақты қозғалыс енгізілген көшелерде жол жүру ережесін бұзғандарды әкімшілік жауапкершілікке тартатын болады. Бұл туралы Астана әкімдігінің баспасөз қызметі хабарлады.
Әкімшілік полиция басқармасының және жергілікті полиция қызметкерлері бір апта бойы көлік иелерімен біржақты қозғалыс ережелері бойынша түсіндіру жұмыстарын жүргізді.
Астанада 28-мамырда Әуезов және Желтоқсан көшелерінде біржақты көлік қозғалысы енгізілген болатын. Бірінші жол учаскесінің ұзындығы – 2,9 км, ол Республика даңғылынан Әлия Молдағұлова көшесіне дейінгі қашықтықты қамтиды. Екінші учаскенің ұзындығы – 2 км, ол Мәскеу көшесінен Кенесары көшесіне дейінгі қашықтықты қамтиды.
11-маусымда Абай даңғылында (Сарыарқа даңғылынан Пушкин көшесіне дейін), Кенесары көшесінде (Пушкин көшесінен Сарыарқа даңғылына дейін) және Янушкевич көшесінде (Абай даңғылынан Иманов көшесіне дейін) біржақты көлік қозғалысы енгізілмек.