Қазақ халқы батырының басын қайтаратынына қатты қуанды. Ол сәтті тағатсыздана күтті. Бірақ сол сәт туғанда, жұрт ойлағандай мемлекеттік деңгейдегі жөн-жоралғыларды көре алмады. Оны қойшы, билік бабасымен қауышпақ қауымнан батырдың бас сүйегін алып қашып, оны жасырып әбден нәумез қылды. Қазір әлеуметтік желі „Атамның басын көрсетіңдер, ейййй„ деп шулап жатыр. Осы, енді дұрыс па?..
Ақын, қоғам қайраткері Арман Қани Facebook-тегі жеке парақшасында мұның барлығы үлкен күдік пен күмән туғызатынын жазады.
„Кейкі батырдың бас сүйегін Ресейден Қазақстанға қайтару мәселесі екі елдің үкімет басшылары деңгейінде шешілгенімен, екі елдің Сыртқы істер министрліктері, елшіліктері бас сүйекті тапсыру-қабылдап алу шараларына қатысқан жоқ. Бас сүйек ұшақпен жеткізілгенде әскерилер тарапынан құрмет көрсету рәсімі жасалмады, тіпті әуежайға арнайы келген туыстарының өздері бұл үрдістен шеткері қалдырылды.
Осы орайда 2013 жылы Ресей жағы шекарадағы кедендік бекетте біздің жерлесіміз, қатардағы жауынгер Нүркеновтың сүйегі салынған контейнерді Кеңес одағының туын жауып құрметтеп қазақстандық әскерилерге тапсырғаны, біздікілер қызыл тудың үстіне Қазақстанның көк туын жауып салтанатпен қабылдап алғаны еске түседі… Осылайша, 1943 жылы Ресейдің Новгород облысында неміс әскерлерімен шайқаста қаза тапқан жауынгердің мүрдесі елге жеткізілген еді.
Тағы бір мысал. Өткен жылы Түркияның әуе кеңістігін бұзғаны үшін атып түсірілген Ресейдің әскери ұшқышының мүрдесі салынған табытты түріктің әскерилері Ресей мемлекетінің туын жауып орыс әскерлеріне салтанатпен қайтарғаны да ойға оралады.
Ал Кейкі бабамызға осындай құрмет те бұйырмады ғой. Өз жерінде отаршылдық саясатқа қарсы шайқасқан ұлт азаттық көтеріліс батырының басы құндылығы шамалы зат секілді Астанаға жеткізілді…
Бүгін «Зерттеу нәтижесінде бас сүйек Кейкі батырдікі екені дәлелденді» деген хабар тарады. Бірақ ДНК сараптамасы батырдың қандай туысынікімен салыстырылып жасалғаны, сараптама жасаушы мамандардың құрамы, кәсібі, біліктілігі, тағы басқасы жайында ештеңе айтылмады…
Демек, Кейкі батырдың бас сүйегіне байланысты түсініксіз жайттар әлі аз емес„