Халықаралық Amnesty International адам құқығын қорғаушы ұйымы Атырау қаласында сотталып жатқан қоғам белсенділері – Макс Боқаев пен Талғат Аянды ар-ұждан тұтқыны деп таныды, делінген ұйым хабарламасында.
Макс Боқаев пен Талғат Аянды Атырау қаласында заңсыз митинг ұйымдастырды, жалған ақпарат таратты және араздық туғызды деген айыптармен соттап жатыр. Олар 10 жылға сотталуы мүмкін. Қоғам белсенділері Атырауда 24 сәуірде жер реформасына қарсы жаппай митингтен соң ұсталды.
Боқаев пен Аянның туған-туыстары сотталушылардың абақтыдағы ауыр жағдайы мен денсаулықтарына алаңдайды, деп жазды Amnesty International. Халықаралық ұйым Макс Боқаев пен Талғат Аянды жақтаушылардың қудалауға ұшырауын да қатаң сынға алды.