Алматы полициясы 16 жастағы жасөспірімнің құлдықта болғаны туралы ақпаратты теріске шығарды.
Бұл туралы Қазақпарат хабарлады.
Бұған дейін бірқатар БАҚ-да аталған ақпарат 10 тамызда жарияланған болатын. 16 жастағы Павлодар тұрғыны 1,5 ай бойы үйіне орала алмаған. Кейін анасына біреулер хабарласып, баласының Алматыда құлдықта екенін хабарлаған.
«Жас жігіт Алматыға ақша табу үшін келгенін айтты. 1,5 ай бойы Алматыда жеке құрылыс орнында күніне 3-4 сағаттан жұмыс істеген. Осы уақыт аралығында ол қонақ үй типіндегі бөлмені жалдап тұрған», – деді ІІД баспасөз қызметінен.
Полиция құлдық туралы қылмыстық істі тоқтатты. Есесіне бұл туралы ақпарат таратқан тұлғаларға қатысты қылмыстық іс қозғалатын болды.
«ҚР ҚК 274-бабының 2-бөлімімен жалған ақпарат тарату бойынша сотқа дейінгі тергеу амалдары басталады. Әр адам айтқан сөзі үшін жауап беруі тиіс. Бүгінде жалған ақпарат таратқан адамдар айыбы дәлелденсе, 5 АЕК мөлшерінде айыппұл төлейді немесе сол көлемдегі түзеу жұмыстарын жасайды. Болмаса 2-5 жылға бас бостандығы шектеулі мүмкін», – деді полициядан.