Алматы әуежайында такси жүргізушілері төбелесіп қалды
Алматы Халықаралық әуежайында такси қызметі жүргізушісі мен жеке көліктің жүргізушісі клиентке таласып, төбелесіп қалды.
Төбелес әуежай аумағында болған, деп хабарлады Tegnrinews.kz. Қазіргі уақытта полиция төбелестің неден шыққанын анықтау үстінде.
“Жәбірленуші – такси қызметінің жүргізушісі арызданудан бас тартты. Кейін полицияға компанияның атынан арыз түсті. Бұл дерек сотқа дейінгі тергеулердің бірыңғай реестрінде “Денсаулыққа қасақана ауырлығы орташа зиян келтiру” бабы бойынша тіркелді.
Сот-медициналық сараптама жасалады. Сонда ғана белгілі болады, себебі жәбірленушінің өзі әлі күнге арыз жазған жоқ. Шағым болмаған соң, біз қандай деңгейдегі жарақат алғанын анықтау үшін тіпті сот-медициналық сараптаманы да бекіте алмаймыз”, – деді Алматы қалалық ІІД ресми өкілі Салтанат Әзірбек.
Оның айтуынша, жеке тасымалдаушының аты-жөні анықталып, одан жауап алынған. Төбелес дерегі бойынша Түрксіб аудандық ішкі істер басқармасының полиция бөлімі тергеу жүргізіп жатыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе