Үйлену тойынан қайтып келе жатқан астаналық азамат Алматы әуежайында полиция қызметкері мен оның әріптесін теуіп, қорлады.
Бұл туралы Stan.kz хабарлайды.
Мемлекеттік қызметкерлерге тіл тигізіп, қорлаған азаматтың үстінен қылмыстық іс қозғалды.
Сот материалдарына сәйкес, өткен жылдың қараша айында Алматы әуежайында «SCAT» авиакомпаниясының өкілі мас болған жолаушыны ұшаққа кіргізбеу үшін Астана-Алматы рейсіне полиция құрамын шақырды.
Сотта кінәсін мойындаған азамат үйлену тойынан Астанадағы үйіне қайтып бара жатқанын айтты. Әуежайдағы әрекетін түсіндірген ер адам, ұшаққа кіргізбегендері үшін ашуланып, осындай жолға бардым дейді. Сотта ол зардап шегушілерден кешірім сұрады. Алайда, полиция қызметкерлері оның кешірімін қабылдамай қойды.
Сот мемлекеттік қызметкерді қорлаған азаматты ҚР ҚК 378-бабы (билік өкілін қорлау) және 380 ( Қазақстан Республикасы Қылмыстық кодексінің өкіліне қарсы зорлық-зомбылық) баптары бойынша кінәлі деп танып, бір жылға бас бостандығын шектеді.