Павлодар облысы Парамоновка ауылында 6-сыныпта оқитын төрт оқушы Ақсу қаласының ауруханасына жеткізілді.
Бұл туралы Рavlodarnews.kz хабарлады.
– Балалардың не себепті құлағаны белгісіз. Орыс тілі сабағы өтіп жатқан кезде бір бала есінен танып қалған. Мен барған кезде құлап жатты. Су әкеліп берген соң есін жинады. Біраздан соң бірінен соң бірі үш баланың жағдайы нашарлай бастады. Дереу Қалқаман ауылдық аймағынан жедел жәрдем шақырттық, – дейді өзінің аты-жөнін айтудан бас тартқан тәрбие ісінің меңгерушісі.
– Барлық сараптама тапсырылып, ешбір дерт анықталмады. Қазіргі таңда жағдайлары жақсы. Бүгін үшеуі ауруханадан шығарылады. Алдын ала “ысты газбен уланған” деген диагноз қойылған. Дегенмен бұл расталмады. Әрі қарай анықтай бастағанымызда от жағатын қазандықтың мектептен тыс жеке ғимаратта орналасқаны белгілі болды. Сондықтан олардың ыстан улануы мүмкін емес, – дейді Бақытжамал Нұралдинова.
Ақ желеңділердің айтуынша, бұл жағдай мектеп ішіндегі жанжалға байланысты орын алуы мүмкін.