Аға-ау, мұныңыз қалай? Ақтөбелік зейнеткер бомба жөнінде жалған хабарлама бергені үшін сотталды
Ақтөбе қалалық соты 69 жастағы жергілікті тұрғын Жақсылық Батановты бомба жөнінде жалған хабарлама бергені үшін 2 жылға бас бостандығынан айырды. Алайда үш ай үйқамақта отырғаны ескеріліп, рақымшылық заңына сәйкес, жазасын өтеу мерзімі қысқартылған. Нәтижесінде Батановты 10 ай және 16 күн қоныстану колониясына жіберу жөнінде шешім шығарылды.
Прокурор алдын Жақсылық Батановтың кезінде өзі жұмыс істеген компания әріптестеріне өкпесі бар екенін, мас кезінде терроризм актісі туралы хабарлағанын айтқан. Прокурордың пікірінше, Батанов 5 маусымда болған қарулы шабуылдан әлі естерін жия алмаған қала тұрғындарын одан сайын үрейлендірген.
Батанов сот залында өзінің кінәсін толық мойындап, жазаны жеңілдетуді сұраған.
Сот процесі кезінде “бомба қойылды” деген ақпараттан кейін оқиға орнына 16 көлікпен 43 полиция қызметкері келгені хабарланған. Оқиға орнына төтенше жағдайлар департаменті мен жедел жәрдем қызметкерлері барған. Аталған қызметтің жетекшілері сотталушыдан 400 мың теңге көлемінде өтемақы талап етті. Сотталушы сот шешімі күшіне енген күннен бастап, бір ай ішінде айыппұлды төлеуі тиіс.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе