Ақтаулық оқушы қазақ мәдениетін дәріптейтін ойын әзірледі
Ақтаудағы Назарбаев зияткерлік мектебінің оқушысы Есбол Азан еліміздің әр өңірінен шамамен 830 қатысушыны біріктірген ұлттық AI-жобалар байқауына қатысты. Ол байқауда SARDAR атты 3D-ойынын қазылар алқасының назарына ұсынып, үздік 20 қатысушының қатарына ілікті.
Қоғамдық коммуникация орталығының мәліметінше, SARDAR – сюжетке құрылған шытырман ойын. Қазір оның алғашқы нұсқасы бар. Ойын қазақ, орыс және ағылшын тілдерінде шығуы жоспарланып отыр. Кейін басқа тілдер де қосылуы мүмкін.
Жас әзірлеуші бұл идеяның бала кезден пайда болғанын айтады. Ол бұрын көп ойын ойнаған, бірақ қазақ тілі мен мәдениетін көрсететін жобаны кездестірмеген. Сондықтан 2024 жылдан бастап геймдевті өзі үйреніп, осы ойынды жасауды қолға алған.
Жоба бірнеше байқауда жүлделі орындарға ие болып үлгерді. Атап айтқанда, республикалық ғылыми жобалар жарысында І орын алып, стартап байқауларында жеңіске жеткен. Сондай-ақ «Tauelsizdik Urpaktary» гранты аясында 1 миллион теңге қаржылай қолдау алған.
Айта кетейік, ойынның толық нұсқасы 2026 жылдың желтоқсан айында Steam платформасында жарияланады. Ал 2027 жылы мобильді қосымша ретінде де қолжетімді болады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе