Келесі апта әкімдіктегілер полицейлермен бірге қала ішіне рейдке шығып, заңсыз адам тасып жүргендерді анықтаймыз деп білек сыбанып отыр. Бірақ оның қиын болатын түрі бар. Бұл туралы КТК хабарлайды.
“Жолдың жиегінде қолды бұлғап, тоқтатып жүргенді тексеру қиын. Себебі, туысқанын, отбасы мүшесін алып жүру мүмкін. Қазір ұйымдасқан түрде қызмет көрсетіп жүрген таксилерге байланысты болады”, – дейді «Астана LRT» ЖШС маманы Әбдіхамит Тамабаев.
Бұл тұрғындар мен қонақтардың қауіпсіздігі үшін жасалып жатқан шара екен. Бірақ, атқамінерлердің жаңа бастаманы қалай жүзеге асыратыны әлі түсініксіздеу. Өйткені, әзірге «такси» деген жазуы бар көліктерді ғана тексермек. Ал ешқандай белгісі жоқ темір тұлпарды бақылау қарастырылмаған. Сондықтан әкімдік шаһардағы такси жүргізушілерін бірігіп, белгіленген тариф бойынша жұмыс істеуге кеңес береді. Қазір Астанада ресми түрде 14 такси компаниясы жұмыс істейді. Ал оларда бар-жоғы 500 көлік қана.