Қорғаныс министрлігінің лауазымды қызметкері 12 жылға сотталды

Астанада миллиондап пара алған Қорғаныс министрлігінің лауазымды қызметкерлері сотталды.

Басты айыпталушылардың бірі – атышулы Төлеміс Жанқазиев енді 12 жылын темір торда өткізуі тиіс,-деп жазды КТК арнасы.

Әрі ол подполковник шенінен айырылып, өмір бойы мемлекеттік қызметтен аластатылып отыр. Сондай-ақ, осы іс бойынша тағы 10 адам әртүрлі жаза арқалады.

Оның 5-еуі кәсіпкер, қалғаны Қорғаныс пен Қаржы министрлігінде лауазымды қызмет атқарған Жанқазиевтың сыбайластары. Жалпы, бұлардың қолына былтыр кісен салынған болатын.

Яғни, министрлікте Материалдық-техникалық қамтамасыз ету басқармасы басшысының орынбасары қызметін атқарған подполковник 20 миллион теңге пара алып жатқан жерінде ұсталған еді.