Ақы төлемеген науқасты емдеудің қажеті жоқ! Еліміздегі емдеу мекемелерінің бірінде өз қызметкерлерін осылай үйретіп жүрген видеодағы бастық Алматыдағы №7 клиникалық аурухананың бас дәрігері екен.
Қол астындағы қызметкерлерге мүмкіндігінше науқасқа түрлі анализдерді тағайындауға кеңес беріп жатқан Әнуар Аманов сол кезде басшы болған. Бас дәрігер бір апта ішінде науқастардан түскен ақшаға көңілі толмай, жиналыс ашып қарамағындағыларды сөгіп жатқан сыңайлы. Аманов одан кейін Алматының №7 ауруханасына қызмет ауыстырған. Қазір бұл іс бойынша арнайы жұмыс комиссиясы құрылып, Әнуар Аманов уақытша қызметінен шеттетілген.
Мұндай жағдайлардың жиі кездесетінін дәрігерлердің өздері де жасырмай отыр. Денсаулық сақтау саласының білгірлері қазір ауруханалардың мүмкіндігінше науқастан көбірек ақша шығаруды көздейтінін ашық айтты.
Ізбасқан Аймағанбетов, Денсаулық сақтау ісінің үздігі:
– Ауырған адамға пайдасы тиетін дәрілерді жазып беру керек. Сосын оның тағы бір кемшілігі бар. Бұрын дәріхананың барлығы үкіметке қарады ғой, ал қазір барлығы жекеменшік. Сосын кейбір дәрігерлер рецепт жазғанда белгілі дәріханадан сатып ал деп айтады. Сыбайластық жоқ емес, бар.