Депутат паралимпиада мен олимпиада жүлдегерлеріне тең сыйақы беруді ұсынды

Мәжіліс депутаты Азат Перуашев бүгін пленарлық отырыста олимпиада мен паралимпиада ойындарының жүлдегерлеріне берілетін сыйақы көлемін теңестіруді ұсынды. Депутат өз ұсынысын премьер-министр Бақытжан Сағынтаевқа айтты.

Бұл туралы Азаттық жазды.

“Бүкіл әлемде мүмкіндігі шектеулі жандардың спорттағы жетістіктері қарапайым cпортшылардың жетістігіне қарағанда жоғары бағаланады. Себебі мүмкіндігі шектеулі спортшылар қарсыласын басып озудан бұрын өзінің сырқатын жеңу үшін біраз қиындықтардан өтуі тиіс. Қазіргі спортта спортшыларды ынталандыру үшін қомақты қаржы салу керек. Қазақстанда олимпиада ойындарында алтын алған спортшыға сыйақы ретінде 250 мың доллар белгіленген. Ал мүмкіндігі шектеулі спортшылардың олимпиада ойындарында чемпион болса 50 мың доллар көлемінде сыйақы беріледі. Яғни, ол дені сау спортшыларға берілетін сыйақыдан бес есеге аз болып тұр. Нәтижесінде мүмкіндігі шектеулі спортшыларымыз Қазақстанның атынан халықаралық жарыстарға қатысып, батылдығы мен ерлігін көрсете отырып, шынын айтқанда олардың еңбегі өздерінің отанында бағаланбай қалады” деді Перуашев.