Айыппұл төлеуден жалтарып жүргендерді жүгендеу бойынша арнайы шара жүргізген Алматы полициясы жүргізуші куәлігі тәркіленіп, оның орнына бөтен біреудің атынан куәлік жасатып алған келіншекті ұстады.
Бұл туралы Алматы қаласы ішкі істер департаментінің баспасөз қызметі хабарлады.
– әл-Фараби даңғылы мен Жараков көшесінің қилысында полиция экипажы „Лексус„ көлігін тоқтатты. Оның ішіндегі 35 жастағы келіншек 2015 жылы алынған К. деген есімді азаматтың жүргізуші куәлігін ұсынған. Мәліметтер базасындағы дерек бойынша, бұл әйел бұрын басқа аты-жөнмен 2003 жылы жүргізуші куәлігін алған болып шықты. Алайда анықтау кезінде келіншек 2015 жылдың қараша айында жол апатын жасап, оқиға орнынан қашып кеткені белгілі болды. Осыған байланысты әкімшілік іс қозғалып, ол әйел 2015 жылдың желтоқсан айынан бастап 12 айға жүргізуші куәлігінен айырылған екен. Алайда, белгілі болғандай, келіншек алаяқтыққа барып, тегін К. қып өзгертіп, сол төлқұжатымен жүргізуші куәлігін алып алған.
Бір қызығы келіншек биыл маусымда тегін К-дан Б-ға тағы өзгерткен. Демек, ол келіншек құқыққорғау органындағыларды қасақана адастырып, жауапкершіліктен жалтарған. Осы қылмысы үшін ол Әкімшілік кодекстің 612-бабына сәйкес әкімшілік жазаға тартылып, көлігі арнайы тұраққа қойылды, ал К. тегіндегі жүргізуші куәлігі алынып қойылды, – дейді Алматы қаласы ішкі істер департаменті Әкімшілік полиция басқармасының бастығы, полиция полковнигі Нұрлан Алмасбеков.
Оңтүстік астанада тамыздың 14 мен 25-і аралығында Алматы қаласы ішкі істер департаментінің жол-патрульдік полициясы мен қалалық әділет департаментінің қызметкерлері бірлесіп, айыппұл төлеуден жалтарғандарды жүгендеу шарасын жүргізіп жатқанын еске сала кетелік.