Ауыл оқушысы ҰБТ-да 125 балл жинады
Батыс Қазақстан облысында Қаратөбе елдімекенінің гимназия оқушысы Ақнұр Беркенова ҰБТ-да 125 балл жинады. Бұл туралы облыстық білім басқармасы мәлім етті, деп хабарлайды BNews.kz.
4-маусым күні өңірде ұлттық бірыңғай тестілеудің үшінші қорытынды кезеңі өтіп жатыр. Түлектер сынақты Махамбет Өтемісов атындағы Батыс Қазақстан мемлекеттік университеті мен Жәңгір хан атындағы Батыс Қазақстан аграрлық-техникалық университетінде тапсырды.
– Екі күні 2566 мектеп түлегі тест тапсырды. Оның 434-і 100-ден астам балл жинады. Ең төменгі шекті 50 балдан оқушылардың 12 пайызы өте алмады. «Алтын белгіге» 142 үміткердің 54 пайызы сенімді ақтады, – деп атап өтті БҚО білім басқармасының бөлім басшысы Светлана Темірғалиева.
– Биыл мектеп түлектеріне ҰБТ-ның тамыз айында қайта тапсыруға мүмкіндік беріліп отыр, – деп хабарлады ҰБТ ұлттық орталығы филалының басшысы Асқар Аманбаев.
2016 жылғы тестілеудің қорытындысы 6-маусымда белгілі болады. Батыс Қазақстан облысында ҰБТ-ға 3416 оқушы қатысады деп жоспарланған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе