Қазақстандағы Халықаралық биофизика академиясының президенті Виктор Инюшин 2019 жылы Алматыда 6 балдық жер сілкінісі болуы мүмкін деген болжам айтты.
Бұл туралы “Астана” телеарнасы хабарлайды.
Индонезиядағы жер сілкінісінің болуы мүмкін екенін дәл айтқан маман 2019 жылы Алматыда да 6 балға дейін жер сілкінісі орын алады деп болжап беріпті.
– Біздің құрылғылар бүкіл тау қыраттарына қойылған. Тіпті, Алтайға дейін. Сондықтан жер сілкінісін біз алдын ала болжай аламыз. Индонезиядағы табиғи апатты да болжадық біз. Қазақстан үшін 2019 жыл ауыр болмақ. Алматыда жер сілкінісі болуын болжап отырмыз. 6 балдық. Бұл тек қала тұрғындары үшін емес, түрлі ғимараттар мен тұрғын үйлер үшін де үлкен сынақ болмақ, – дейді ол.
Қазіргі уақытта барлық ғимараттардың сейсмикаға төзімділігі тексерілуде. Ең алдымен оқу орындары мен медициналық мекемелер жағдайы бақылауға алынған.
Алматы қалалық сәулет және құрылыс басқармасының басшылығы өткен жылы осы мақсатта мемлекеттік қордан 500 миллион теңге бөлінгенін айтты. Ал биыл тағы да 300 миллион теңге қарастырылыпты.
Мамандардың сөзінше, Алматыдағы ғимараттардың көпшілігі сейсмикалық тұрақты деп танылған. Егер ол талаптарға сай келмесе, жақын арада қалыпқа келтіру керек дейді олар.
Индонезияда жойқын жер сілкінісінен жүздеген адам қаза тапты
Қазіргі уақытта қаладағы ең сейсмикалық тұрақты ғимарат ретінде 1975 жылы салынған “Қазақстан” қонақүйі танылған екен.
Айта кетейік, Инюшин Индонезиядағы табиғи апаттың болатынын 20 күн бұрын болжап, дабыл қаққан.
Индонезияда жер сілкінісінен қаза тапқандар саны 1,2 мың адамнан асқан