Арыстанбек Мұхамедиұлы пара алды деген дауға қатысты адвокат мәлімдеме жасады

80 просмотров

Арыстанбек Мұхамедиұлының адвокаты Ескендір Әлімбеков түсірілімі тоқтап тұрған «Феникс» фильмінің режиссері Талғат Жәнібековпен байланысты дауға араласты.

Бұл туралы BNews.kz хабарлайды.

— Талғат Жәнібеков Қазақстан Республикасы мемлекеттік органдары мен ҚР мәдениет және спорт министрі Арыстанбек Мұхамедиұлының қызметіне баға бере отырып, мәлімдеме жасаған болатын, ондағы мәліметтер шындыққа жанаспайтынын растаймыз. Арыстан Мұхамедиұлы бұзылған құқығын заң жүзінде қалпына келтіруге ниетті. Сонымен қатар, Талғат Жәнібековтің кей сөздерін тікелей жоққа шығаруға мәжбүр болып отыр, — деп атап өтті адвокат.

Мысалы, «Феникс» фильмін түсіру туралы келісім голливудтық «Aldamisa Entertainment» компаниясымен жасалмаған, шындығында Қазақфильм «T.K.TURANUNIVERSAL BUSSINES» және ресейлік «Альдамиса РУС» компанияларымен келісімге қол қойған екен.

ҚР Мәдениет министрлігі салық төлеушілердің 450 млн теңгесін заңда қарастырылмаған тәртіпте аудару мүмкіндігіне күмән келтірген.

— Жәнібековтің шағымы негізінде құқық қорғау және сот органдары тексеріс жүргізді, нәтижесінде ҚР Мәдениет министрлігі қызметінде заң бұзушылықтар анықталған жоқ. Сонымен қатар «Феникс»  кинофильмінің өндіріс жағдайы мен бұған дейін бөлінген 100 млн теңге көлеміндегі мемлекет қаражатының игерілу барысы зерттеліп жатыр, — деп толықтырды  адвокат Әлімбаев.

Естеріңізге сала кетейік, Талғат Жәнібеков 2015 жылы Арыстанбек Мұхамадиұлы министр қызметіне кіріскен соң Мәдениет және спорт министрлігі «Феникс» фильмінің түсірілімін заңсыз тоқтатып тастады деп кінәлаған болатын. Ол министр пара сұрады деп мәлімдеді. Осы негіздегі оның видео үндеуі 12-шілдеде интернетте тарап кетіп еді.

 

 

Загрузка...