Ұзынағаш базарында мал сатып жүріп, із-түзсіз жоғалған үш жігіттен әліге дейін еш хабар-ошар жоқ. Ал бүгін олардың екінші жүк көлігі табылды.
Бұл туралы Baq.kz хабарлайды.
Өткен жексенбіде, яғни, 18 қыркүйек күні аталған базардан екі камазға 40 бас мал тиеп шыққан үш жігіттің өртенген бір көлігі 19 қыркүйекте Алматы-Астана тасжолына жақын маңдағы Қаншеңгел ауылынан табылған болатын.
Мүлде хабарсыз кеткен үш азаматтың туысқаны Адал Зарлыхан есімді жігіттің айтуынша, бүгін табылған екінші көліктің аккумуляторы ұрланған. Басқа жері аман. Күдіктілер оны алыс ауыл маңына айдап апарып, тастап кеткен. Өзге еш дерек жоқ. Біздің редакцияға табылған көліктердің фотосы мен видеосын жіберген Адал Зарлыхан інілерінің аман-есен табылуын тілеп отыр.
Мал саудасымен айналысатын 1979 жылғы Долданұлы Жарқынбек, 1973 жылғы Зарлыханұлы Мұқият пен Әлімхан Қадылбек есімді жігіттердің хабарсыз кеткені туралы кеше хабарлаған болатынбыз.