Жедел жәрдем көлігінің жүргізушісін ұрған жігіт екі жылға сотталды

Қарағандыда жедел жәрдем көлігінің жүргізушісін соққыға жыққан Нұрболат Дәкебаевқа сот үкімі шықты. Жұдырығы жуан сотталушы енді екі жылын түрмеде өткізіп, жәбірленушіге қомақты өтемақы төлеуге тиіс.

«Моральдық шығынның өтемақысы 2 миллион теңге. Адвокаттың қызметіне деп көрсетілген 700 мың теңге де өндірілсін. Оның денсаулығына айтарлықтай зақым келді. Емдеуге кеткен дәрі-дәрмектің құны 12 мың 160 теңге. Оны ол құжаттармен дәлелдеп отыр. Сондықтан жәбірленушінің пайдасына өндіріледі», – деді судья Бақтияр Ақанов.

Сот шешімі бойынша Нұрболат Дәкебаев өтемақы мен сот шығындарын бір ай ішінде өтеуге тиіс. Ал өзі сот залынан бірден колонияға аттанады. Сот оның бірінші ақпаннан бастап қамауда отырған бір күнін екі күнге есептеді. Сондықтан ол бір жылдай уақытын өтеп тастады деп есептеледі. Қалғаны — бір жыл. Мерзімінің жартысы өтелгендіктен, уақытынан бұрын бостандық сұрауына мүмкіндігі бар.