БТА-банктің экс-басшысы Әблязов 20 жылға бас бостандығынан айырылды.
Үкімді Алматы қалалық Қылмыстық істер жөніндегі ауданаралық мамандандырылған соты шығарды, – деп хабарлады Tengrinews.kz.
Бас бостандығынан айырумен қатар оның мүлкін тәркілеу және 300 айлық есептік көрсеткіш көлемінде айыппұл салу, сондай-ақ, банктерде қызмет етуге 3 жылға тыйым салу жазасы тағайындалды.
Ол жазасын қауіпсіздік деңгейі өте жоғары қамтылған оқшауланған жаза өтеу мекемесінде өтеуі тиіс.
Басқарма төрағасының бірінші орынбасары – Кредит комитетінің төрағасы Жақсылық Жарымбетовті сот 5 жылға шартты түрде соттауға үкім кесті. Мұнымен қатар, ол банк ұйымдарында қызмет ету құқығынан 3 жылға айырылды. Ол да қылмысын толықтай мойындаған.
Кінәсін ішінара мойындаған кредиттеу жөніндегі директор Қайрат Садықов 15 жылға бас бостандығынан айырылып, мүлкі тәркіленді. Оған 300 АЕК көлемінде айыппұл салынды және банк ұйымдарында қызмет ету құқығынан 3 жылға айырылды.