Жамбыл облысына кенемен күресу үшін 137 млн теңге бөлінді

Жамбыл облысының аудандарында конго-қырым қанды безгегінің табиғи ошақтарында орналасқан елді-мекендерді залалсыздандыру шаралары аяқталды.

Бұл туралы ҚазАқпарат хабарлады.

Конго-қырым қанды безгегінің табиғи ошақтарында орналасқан елді-мекендерді қорғау бойынша жоспарлы шараларға 137 миллион теңге бөлінді, – деді Жамбыл облысы әкімдігі ветеринария басқармасының басшысы Оспан Бердияров.

«Жамбыл облысында 92,6 млн теңгеге кенеге қарсы қолданылатын дәрілік препараттар сатып алынады. Ал дәрілеу шараларын жүргізуге аудандардың бюджетінен 45,7 млн теңге бөлінеді», – деп нақтылады ол. Бұған дейін Жамбыл облысы аумағында улы кененің табиғи ошақтары Мойынқұм, Сарысу және Талас аудандарына 70 мыңнан астам адам өмір сүретін 49 елді-мекенге тарады. 2015 жылы аса қауіпті вирустың Жамбыл ауданынан да табылу фактісін мамандар бақыланбаған малдың көшуімен түсіндірді.