“Жағдай былай ғой…”. Қыдырәлі қатты айтты
Белгілі әнші, продюсер Қыдырәлі Болманов қазақта тойдан басқа да проблема толып жатыр депті. Бұл туралы хабарлайды Sputnik Қазақстан.
Болмановтың айтуынша, тойды тоқтатқан күннің өзінде, ел экономикасы өсіп кетпейді.
“Егер біз дамығымыз келсе, тойды емес, шағын және орта бизнесті жолға қоюға күш салуымыз керек. Ал тойдың әңгімесін, сіз айтасыз, Ақанның кезінде де, Біржанның кезінде де айтқан. Бірақ оның экономикаға түк қатысы жоқ. Қазақ әрқашан барын қызығы мен қуанышына шашқан халық. Енді келіп, сонымен алысамыз ба? Той, асаба, фонограмма деп шулаймыз, жалпы онда мәдениет мәселесіне тоқталып, жақсылап жүйелі жұмыс жүргізу керек. Ондай жұмыс жоқ”, — деді әнші Төреғали Төреәлі түсірген “Ұлы дала комедиясы” фильмінің премьерасында.
Қыдырәлі Болманов ел ағалары он жылдан бері тойға тиісіп келе жатқанын атап өтті. Айтуынша,экономиканы көтеру, шағын және орта бизнесті жолға қою, отандық киноиндустрияны дамыту мәселелері далада қалып жатыр.
“Күлкім келеді соған. Басқа проблемаларымыз бастан асады. Тойды тоқтатқан күннің өзінде де экономикамыз өспейді”, — деп толықтырды ол.
“Егер біз осы қалпымызда отыра берсек, біздің ішкі нарық, экономикамыз ешқашан өспейді. Мәселен, біз ойыншық, шұлық шығарамыз. Бірақ Италия, Қытай, Ресей немесе Беларусь компанияларымен бірдей салық төлейміз. Неге біз отандық өнім шығара тұра, шетелдік компаниялармен бірдей салық төлеуіміз керек?! Неге қазақстандықтар өз ақшасына сырттан келетін тауарларды сатып алып, бәрін шетелге жіберуі керек?”, — дейді Болманов.
Оның пайымынша, қаржылық айналым тоқтамай, біздің шағын және орта бизнесіміз ешқашан дами алмайды. Ол дами алмаса, экономика ешқашан көтерілмейді.
Қыдырәлі Болманов Халыққа қызмет көрсету орталығына “жұмысқа тұрды”
“Сол ағаларымыз экономикамен айналысудың орнына, келіп тойға тиіседі. Құдды бір қазақтың тойынан экономикамыз көтерілмей жатқан сияқты… Басқасының бәрін қатырып қойғандай, той, фонограмма деп шулайды”, — деп түйіндеді әнші.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе