Қытай Қазақстан арқылы Ұлыбританияға жүк тасымалдайтын пойызды іске қосты

4 қантар 2017, 20:30

2017 жылдың басынан бастап Қытайдың Чжэцзян провинциясындағы Иу қаласы мен Лондон арасында жүк тасымалдайтын жаңа қызмет іске қосылды. Жаңа қызмет екі ел арасында тауарларды тасуға жұмсалатын қаражат пен уақытты үнемдеуге бағытталған.

Айта кетейік, пойыз 18 тәулікте 12 мыңнан аса шақырымды жүріп өте алады. Ол Қазақстан, Ресей, Беларусь, Польша, Германия және Франция арқылы жүретін болады. Сондай-ақ, бастапқыда пойыздардың аптасына бір рет жүретіні айтылады. Осылайша, бірінші пойыз қажетті тауарларды: сөмкелерді, киім-кешектерді және тағы да басқа заттарды тасымалдайды.

“Бұл қызмет түрі Ұлыбритания мен Қытай арасындағы сауда ынтымақтастығының маңызды екенін көрсетеді”, – деді Onetwothree Logistics менеджері Оскар Лин. Сондай-ақ, осыған дейін қытайлықтар 2020 жылға қарай теміржол желілерін 150 мың шақырымға дейін кеңейткісі келетінін мәлімдеген болатын.