Алматыда қала әкімі Бауыржан Байбектің төрағалық етуімен 2017 жылы өтетін 28-ші Бүкіләлемдік Универсиадаға орай әуежай жұмысын жақсарту туралы мәселе талқыланды.
Шара барысында кеңес мүшелері мегаполистің басты әуе гаванының жұмысын жақсарту туралы өз ұсыныстарын ортаға салды, деп хабарлайды қалалық әкімдіктің сайты.
«Экономикалық, инвестициялық, туристік орталық бола алатын қала үшін әуежай гаванының маңызы зор. Әсіресе, Универсиада – 2017 және EXPO-2017 секілді маңызды халықаралық шаралар қарсаңында. Осы ретте болашақ дамудың басты бағыты – туризм. Бұл – біздің қаламызды жаңа сапалы деңгейге көтеретін табыс көзі. Дегенмен, бүгінгі таңда әуежай өзінің ауқымы жағынан мегаполис деңгейіне сай келмейді. Тіпті қазірдің өзінде ол жолаушы тасымалын талапқа сай жүзеге асыра алмай отыр», – деді Бауыржан Байбек.
Қоғамдық кеңес мүшесі Марат Шибутов 2017 жылы Алматыға келетін жолаушылар санының артатындығын, ішкі және сыртқы туристердің көп болатынын, бұл әуежай жұмысының көлемін ұлғайтатынын, сондықтан оның қызметін жақсарту керектігін сөз етті.
«Қалалықтар мынадай: жүк аймағының жұмысын жақсарту, бірнеше жерге арыз-шағым кітаптарын қою, санитарлық тораптар жұмысын жандандыру пікірлер мен нұсқауларды ұсынып отыр. Егер залдарды кеңетуге мүмкіндік болмаса, көп орындықтар қою қажет», – деді Марат Шибутов.
Кеңестің жұмысын қорытындылаған қала басшысы әуежай жұмысын жақсарту туралы нақтылы тапсырмалар берді.
Бүгінгі күні әуежай тасымалдау көлемі бойынша елімізде жетекші орында. 2015 жылы 5 млн жолаушыға қызмет көрсетілді. Жолаушылардың қауіпсіздігі үшін мұнда видеобақылау жүйесі (852 видеокамера) жұмыс істейді. Бұлардан өзге ішкі ұшу мен келудің терминалы қайта жасалған. Шекаралық қызмет үшін бақылу – өткізу пункттерінің саны 32-ден 42–ге артқан.