«Қазақстан Инжиниринг» холдингі мен Түркияның «Отокар» компаниясы серіктестік туралы меморандумға қол қойды. Өзара келісім бойынша түркиялық компания Қазақстан аумағында бірлесе отырып, бронды машиналарды құрастырмақ ниетте.
Бұл туралы «KADEX-2018» V халықаралық көрмесі кезінде белгілі болды.
Қол қойылған құжатқа сәйкес, қазақ-түрік бірлескен кәсіпорыны Қазақстан аумағында көлік құралдарын, соның ішінде бронды машиналарды жаңарту, жөндеу, сонымен қатар жобалау, құрастыру және тасымалдау жұмысын жүзеге асыратын болады.
«Техникалық-экономикалық негіздемесі және ҚР-да бронды машиналардың өндірісі бойынша бірлескен бизнес-жоспары бойынша «Қазақстан Инжинирингпен» жасалған бұл меморандум біздің Қазақстанмен бірлесе жұмыс жүргізу ниетімізді бекемдей түседі», – деді «Отокар» компаниясының бас директоры Сердар Гергюч «KADEX-2018» V халықаралық көрмесінде құжатқа қол қою рәсімінен соң.
«Осылайша, құжат Қазақстан Республикасының Қарулы Күштері үшін бронды машиналарды бірлесе жасауға қарай бағытталған алғашқы қадам болып отыр», – деді ол.
Еске сала кетсек, «KADEX-2018» V халықаралық көрмесі басталған күні (кеше) «Отокар» компаниясының бас директоры Сердар Гергюч компанияның бронды машина жасау технологиясын Қазақстандағы өндіріске енгізуге дайын екенін мәлім еткен болатын. Дәл сол күні көрме аясындағы сессияда «Отокар» компаниясының бизнесті дамыту бойынша директоры Тамер Сиркали түркиялық әскери бронды дөңгелекті көліктердің әлеуеті туралы айтып берген еді.