Нұр-Сұлтан
Қазір
-6
Ертең
2
USD
455
+6.28
EUR
499
+4.91
RUB
5.56
+0.07

Төртаяқты сарбаздар: Ұлттық ұланның 24 күшігі қызметке дайындалып жатыр

6654 әскери бөлімінің кинология орталығы – Ұлттық ұлан жүйесінде кинолог мамандарды даярлаумен қатар, қызметтік иттерді өсірумен айналысатын бірегей орталық. Мұнда осы жұмыстарды жүргізуге қажетті оқу-материалдық база жасақталған. Атап айтқанда, арнайы жабдықталған вольерлер, жаттығу алаңдары, ветеринарлық блок және азық дайындау орталығы бар. Иттердің тамақтану рационы олардың жас ерекшелігі мен физикалық жүктемесіне қарай белгіленеді.

Болашақ қызметтік иттерді даярлау олардың жеке ерекшеліктерін ескере отырып жүргізіледі. Алты айлық кезінен бастап күшіктер белсенділігіне, мінез-құлқы мен қабілетіне қарай тиісті бағыттарға бөлінеді. Бірі есірткі заттарын іздеуге, енді бірі жарылғыш заттарды анықтауға үйретіледі. Сондай-ақ патрульдік қызмет атқаратын және құқық бұзушыларды ұстауға машықтанатын иттер де бар.

Төртаяқты көмекшілердің жауынгерлік қызметтегі тиімділігі нақты нәтижелерден көрінеді. Жыл басынан бері Ұлттық ұланның қызметтік иттері 51 жағдайда қолданылған. Олардың көмегімен қылмыс белгілері бар құқық бұзушылықтарға қатысы бар 27 адам ұсталды. Өсімдік тектес және синтетикалық 6 келіден астам есірткі заты анықталып, тәркіленді. Бұдан бөлек, бір суық қару, 11 атыс қаруы және екі травматикалық қару анықталды. Сондай-ақ хабар-ошарсыз кеткен екі адамның жүрген жері белгілі болды.

Ұлттық ұланның қызметтік иттері көрмелерде де бақ сынап жүр. Атап айтқанда, қызметтік иттер «A.SIRIUS 2026 Шоқжұлдызы» және «Алтын күз» халықаралық көрмелерінде өздерінің дайындығын көрсетіп, сарапшылардың жоғары бағасына ие болды. Бұл жетістіктер кинолог мамандардың кәсіби шеберлігін де айқындайды.

Кинология орталығында әрбір иттің бойындағы табиғи қабілеттерді дамытуға ерекше көңіл бөлінеді. Мамандар күшіктердің мінез-құлқы мен ерекшеліктерін ескере отырып, оларды алдағы қызметке кезең-кезеңімен дайындайды. Нәтижесінде төртаяқты көмекшілер есірткі мен жарылғыш заттарды анықтау, қоғамдық тәртіпті сақтау және құқық бұзушыларды ұстау кезінде ұландықтардың сенімді серігіне айналады.

Серіктестер жаңалықтары
Көп қаралған
© «365 Info», 2014–2026 [email protected], +7 (727) 350-61-36
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе
Қате байқасаңыз, оны белгілеп Ctrl+Enter басыңыз