Тоқты екен деп құрбандыққа шетінен шала беруге болмайды – имам
Құрбандық шалудың өз тәртібі мен нұсқауы бар. Мәселен, жыл басында туған қозылар қазір тоқты болғаныменен құрбандыққа жарамайды.
Бұл жөнінде Талдықорған қаласындағы «Иман» орталық мешітінің бас имамы Серікхан Ырымханұлы мәлім етті, деп хабарлайды ҚазАқпарат. Оның сөзінше,
құрбандыққа шалынатын тоқты кем дегенде алты айдан асқан және ірі болуы шарт. Ал ірі-қара болса екі жасқа толған болуы керек. Және сойылатын малдың көзін байлау қажет.
«Малды союға кіргізген кезде оның көзін байлау қажет. Өйткені біз ғылыми түрде жақсы білеміз. Мал тітіркеніп, шошып қалса, оның қаны толық ақпайды. Ал қаны толық ақпаған мал адамды ауруға шалдықтыруы мүмкін. Біздің Талдықорған қаласының өзінде «Нұр», «Иман», «Жетісу» және «Еркін» мешітінде құрбан шалатын жерлер дайындалып жатыр. Ол жерде құрбан шалатын адамдарды арнайы курстардан өткіздік. Олардың діни мінез-құлқы дұрыс болуы керек. Айтатын дұғаларын білуі керек», – дейді Серікхан Ырымханұлы.
Ал қарызы көп, жағдайы жоқ жандардың құрбандық шалуы міндет емес. Жалпы, бүгінгі таңда Талдықорған жерінде малдың бағасы аса шарықтай қойған жоқ. Мәселен, қойдың бағасы 20 мыңнан 32 мың теңге аралығында. Сатушылар саудаласуға да дайын екендіктерін айтады. Бұл күндері 70 такси қала тұрғындарын тегін тасымалдайтын болады. Сондай-ақ түрлі шаралар да ұйымдастырылмақ.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе