Тоқаев латын қарпіне көшуде асығыстық танытпауға шақырды

3 қыркүйек 2020, 17:47

177

Қасым-Жомарт Тоқаев мәдениет, спорт, туризм, тіл саясаты, ономастика және мұрағат ісі салаларындағы министрліктің қазіргі қызметі туралы хабардар болды. Райымқұлова сондай-ақ Мемлекет басшысы тапсырмаларының орындалуы туралы есеп берді, деп хабарлайды Ақорданың баспасөз қызметі.

Министрдің айтуынша, бұқаралық спортты дамыту бойынша белсенді жұмыс жүргізілуде, мәдениет қызметкерлерінің еңбекақысын арттыру бойынша бастамалар іске асырылуда. Қазіргі уақытта олардың жергілікті жерлердегі жалақысы 35%-ға өсті, ал республикалық деңгейде өсім 50%-ды құрады. Сонымен қатар, президентке пандемия кезінде ведомство өткізген онлайн-іс-шаралар туралы ақпарат ұсынылды.

Райымқұлова Мемлекет басшысына қазақстандық спортшылардың алдағы Олимпиада ойындарына дайындық барысы, жаңа туризм және қонақжайлылық университетінің ашылуы туралы хабарлады.

Кездесу соңында Тоқаев Жолдаудың басым бағыттарын тиісті деңгейде іске асыру, оның ішінде бұқаралық спортты қолдау мен танымалдығын арттыруға қатысты бірқатар нақты тапсырма берді. Президент қазақ әліпбиін латын графикасына көшіруде ғалымдармен жан-жақты талқылау жүргізіп, асықпай жүзеге асырылуы керек екенін атап өтті.