«Тек қана қыздар» КТА тобының жетекшісі тұрмысқа шықты
Қазақ мемлекеттік қыздар педагогикалық университетінің «Тек қана қыздар» көңілді тапқырлар тобының жетекшісі Мереке Қалбаева тұрмысқа шықты.
Ұзату тойы Шымкент қаласында өткен. Бұл туралы ол әлеуметтік желідегі парақшасында: «Қыз баласы (еркекшора болсын, мың жерден өзін мықты қылып көрсетсе де) дәл осы күні жүрегің қақ айырылардай күйде болады екен. Оны тек басынан өткендер ғана түсінеді! Мен қуанышты күнімді тек жақсы адамдардың қолдауымен дыммм шашылмай)), аман-есен керемет деңгейде өткіздім! Аллаға шүкір!», – деп, қуанышына ортақтасқан жандарға ізгі ниетін білдіріпті.
Айта кетейік, бүгінде М. Қалбаева Қазақ мемлекеттік қыздар педагогикалық университетінің Медиа департаментінде қызмет атқарады. Ол жетекшілік ететін «Тек қана қыздар» жайдарман тобы жуырда республикалық КТА ойындарында үш кубок иеленіп, жарыстың келесі кезеңіне және Астана қаласының 25 жылдығына орай ұйымдастырылатын «Арнайы жоба» атты сайысқа қатысуға жолдама алды.
– Тобымыздың құрылғанына биыл 7 жыл толды. Одан бері команда құрамы өзгерді. Қатарымызға өзіндік ойлары мен тың идеялары бар студенттер қосылды. Біз осы уақытқа дейін республикалық, аймақтық ойындарда көптеген жеңістерге жеттік. Бұл – еселі еңбекпен келген табыс. Алға қойған негізгі мақсатымыз да осы болатын. Қазір алдағы ойындарға қызу дайындық үстіндеміз. Болашақта бұдан да биік белестерді бағындыратынымызға кәміл сенімдіміз. Осы орайда ойынға қатысуға қолдау көрсеткен Қыздар Университетінің ректоры Гаухар Төремұратқызы Алдамбергеноваға алғыс білдіреміз, – дейді команда жетекшісі Мереке Қалбаева.
Осы орайда белгілі өнерпазды Қыздар Университетінің Медиа департаментінің ұжымы да құттықтап, ізгі ниетін білдіреді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе